RSS

माणसं …

23 Sep

माणसं !

१९९७ साली सोलापूरसारख्या तुलनेने छोट्या शहरातून मुंबईत आलो. शिक्षण आणि आई-वडिलांनी दिलेला आत्मविश्वास एवढी शिदोरी होती जवळ. सुरुवातीला मिळेल ती कामे केली. मग त्यात अगदी इलेक्शन ड्युटीवर प्रगणक, डेटा एंट्री ऑपरेटर, चेकर (ओल्ड कस्टम हाऊससाठी) हे सुद्धा केलं. सकाळसाठी काही काळ वाचक संपर्क प्रतिनिधी म्हणून काम केलं. काही ठिकाणी इन्व्हर्टर्स, फॅक्स, कॉपीअर मशिन्ससाठी सर्व्हिस इंजिनिअर म्हणून राबलो. कॉइन बॉक्सेस, एसटीडी मॉनिटर्स विकले. वेइंग स्केल्स विकले. संगणक रिपेअरिंग, सर्व्हिसिंगची कामं केली.

या सगळ्यातून पैसा फारसा नाही मिळाला. पण माणसं समजायला लागली, हा मात्र मोठा फायदा झाला. तसेही पैसा फक्त सोय करतो, सुविधा पुरवतो. समाधानासाठी माणसेच उपयोगी पडतात. पहिला जॉब डेली ११७₹ पगारावर केला होता तेव्हाही विवंचना होत्या आणि आता महिना लाखाच्या वर कमावतो आजही विवंचना आहेतच. पण या प्रवासात जी माणसं भेटली ती या सगळ्यापेक्षा खूप मोठी होती, आहेत. नोकरीच्या निमित्ताने फिरती चालूच असते.

जगभर फिरलो … ! रंग बदलतो फक्त आणि काही प्रमाणात भाषा. पण माणसे तीच असतात. तुमच्यावर प्रेम करणारी, तुमचा तिरस्कार किंवा हेवा करणारी. बाह्यरंग, दर्शन बदलत राहते पण अंतर्यामी तोच साक्षात्कार होत राहतो. यात सोलापूरचा माझा जिवलग मित्र राजा असतो. माझ्या तथाकथित सॉफीस्टिकेटेड सर्कलमधले लोक राजाला टाळायचे पण त्यामुळेच कदाचित मी जास्त अटॅच होत गेलो राजाबरोबर. केत्यासारखा (अमोल केत) मित्र आज सनदी अधिकारी होवून मोठ मोठी पदे भुषवतोय. पण भेटला कि आजही तो आमचा केत्याच असतो. आजही मी त्याला न लाजता, न संकोचता एक कचकचीत सोलापूरी शिवी हासडू शकतो. यात अजून खूप नावं राहिलीयेत पण ती नातीसुद्धा तितकीच मजबूत आहेत. यात शाळेतली रावशा , सँडी, मन्या, किश्या , सोमा आणि कॉलेजातील श्रीनी हि अंतरंगी माणसं आजही माझ्या आयुष्यात आहेत यापरीस वेगळं काय हवं? भंडारीमध्ये भेटलेला दादूस, दोन किंवा तीन वेळा फार फार. पण तेवढे पुरेसे असते नाते जुळायला !

हॉलंडमध्ये भेटलेले कोर लॅण्डस्मन किंवा मॅक्स बोर्जरसारखे मित्र आज सहा सहा वर्षे भेट नसूनही रेग्युलर संपर्कात राहतात तेव्हा पटायला लागतं कि माणसे माणसेच असतात, तुम्ही जगाच्या पाठीवर कोठेही जा. ऑस्ट्रेलियात भेटलेली जिवलग मैत्रीण कॅरेन तिच्या गोड लेकीचे फोटो आठवणीने पाठवते. करायकल सारख्या देशाच्या एका कोपऱ्यातल्या बंदरावर तीन चार दिवस बरोबर असलेला , माझी भाषाही न समजणारा जेट्टीवर काम करणारा फोरमन मुथ्थु आज ही आठवणीने फोन करतो आणि मोडक्या तोडक्या इंग्रजीत सांगतो, ‘स्सार, वि मिसेस यु लाट!” तेव्हा वाटून जातं की अरे आपण उगीचच देवाच्या आणि देवाच्या नावाने कुरकुर करतो. त्याने भरपुरच दिलंय कि आपल्याला.

कुठल्यातरी वळणावर भेटलेला स्वतःला निवांत पोपट म्हणवणारा अवलिया, थोड्याशा सहवासाने आयुष्य समृद्ध करून गेला माझं. अशोक पाटील नावाचं एक अतिशय लाघवी व्यक्तिमत्व कुठल्यातरी बेसावध क्षणी आयुष्यात येतं आणि तुमच्या आयुष्याचा एक भाग बनून जातं.

पुण्यात भेटलेला आमचा ‘म्हातारा’ , प्रसन्नदा, आजवर फक्त एकदाच भेटलेला गुऱ्या, स्वाम्या, सातारकर, सोत्रि, अण्णा आणि अर्ध्या हि मंडळी नकळत आयुष्याचा एक अभिन्न भाग बनून जातात. सी एल, कौत्या, सई, क्रान्तिताई, पराग, पल्ली, दक्षी, हर्षद, इन्ना आणि ‘आरती’ यांच्यासारखी माणसे आयुष्यात आनंदाचे झाड बनून येतात ! माझ्याच गावचा असलेला अभ्या ऑस्ट्रेलियात भेटतो आणि एकाच भेटीत त्याच्या प्रेमात पाडून जातो. माणूस माणूसवेडा असणं हि किती सुखाची, आनंदाची गोष्ट असते ना?

सख्ख्या बहिणीपेक्षा जास्त जवळची झालेली मेव्हणी (हे काही जणांना आश्चर्यकारक वाटेल, पण आहे) आणि आमच्या सगळ्या समस्यांमध्ये ठामपणे आमच्या पाठीशी उभा राहणारा तिचा नवरा पशा उर्फ प्रसाद, सगळ्यात महत्वाचे म्हणजे निव्वळ तथाकथित संस्कार न करता, संस्काराचा अर्थ समजावून जगण्याचे गाणे शिकवणारे जन्मदाते आईवडील आणि निव्वळ बायको न राहता सखी झालेली जोडीदारीण या सगळ्यात मोठ्या भेटी असतात आयुष्याने दिलेल्या.

जगण्याची लढाई चालू आहे, चालू राहीलच. पण सुरुवातीला वाटायची तशी भीती आता वाटत नाही. कारण आता मी एकटा नाहीये !

फार काही नाही. आभार प्रदर्शन तर मुळीच नाही. असलंच तर हे माझ्या श्रीमंतीचं प्रदर्शन आहे. कुणाला हेवा वाटला तर वाटू द्या, त्यात वाईट काहीच नाही. तो हेवाच आपल्याला अजून माणसं जोडायला शिकवेल. सद्ध्या इतकंच.

बोलत राहू ….

विशल्या सोलापूरकर

 

तुमचा अभिप्राय नोंदवा

Fill in your details below or click an icon to log in:

WordPress.com Logo

You are commenting using your WordPress.com account. Log Out / बदल )

Twitter picture

You are commenting using your Twitter account. Log Out / बदल )

Facebook photo

You are commenting using your Facebook account. Log Out / बदल )

Google+ photo

You are commenting using your Google+ account. Log Out / बदल )

Connecting to %s

 
%d bloggers like this: